Categories
في البيت

ازاى تنظفى غسالة الأطباق؟

غسالة الأطباق دى دراعى اليمين فى المطبخ و معرفش كنت عايشة ازاى من غيرها. بتشيل عنى نص المجهود على الأقل و بالأخص فى العزومات. بس برضه محتاجة عناية عشان متعملش ريحة او تتسد و تفضل تنضف كويس. انا راجعت المانيوال بتاع غسالتى و اتعلمت منه ازاى انضفها بنفسى و من غير اى مصاريف او ادوات اضافية. مش هتحتاجى انك تجهزى اى حاجة غير خلة سنان و فرشة سنان قديمة و كوباية مياه دافية عليها معلقة كبيرة خل.

 

ابتدى من جوه: طلعى باسكت المعالق و اتأكدى ان مفيش اى بقايا أكل محشورة جواه. حتى لو بتبصى كل مرة، احياناً فيه حاجات بتستخبى فى الأركان و مبتنزلش فى الغسالة. اسهل حاجة انك تقلبى الباسكت و تشطفيه كويس. كررى الخطوة دى مع اى اكسسوارات بتركب فى غسالتك.

 

فكى الأدراج: و كررى نفس الخطوة اللى فوق بس زيادة عليها نضفى الجرار اللى بيدخل فيه الدرج. لما بتترسب فيه دهون او بقايا اكل اثناء رص الغسالة بتخلى حركته صعبة و كمان بيعمل ريحة. مشى فيه فرشة سنان مبلولة بمياه دافية و شوية خل.

 

فضى الفلتر: فى كل الغسالات فيه فلتر فى القاع. الغريب ان فيه ناس كتير مش عارفين انه موجود. راجعى المانيوال بتاع غسالتك عشان تعرفى بيتفتح ازاى. المفروض ان طريقته بسيطة. الفلتر ده بقى سلاح ذو حدين فعلاً، هدفهه ان بقايا الأكل متنزلش فى خرطوم الصرف عشان الغسالة متتسدش بس عيبه انه بيحوش البقايا دى و هى دى اساس مشكلة الريحة المش ظريفة. بعد ما تفكى الفلتر و تفضيه تماماً، افركيه بفرشه مبلولة بمياه دافية و نقطة خل.

 

الرشاشات: مجرد محتاجة خلة سنان رفيعة تتأكدى منها ان كل الرشاشات سالكة. مش بس الأكل هو اللى بيسد الغسالة، المياه برضه بتسيب ترسبات و هتلاحظيها لما تلاقى الغسالة مش بتنضف كويس.

 

غسلة ذاتية: احلى حاجة فى الغسالة انها برضه بتنضف نفسها. بس هتحتاجى تساعديها. ركبى كل حاجة و حطى الصابون كأنك هتغسلى عادى. الخطوة الزيادة هى حوالى نص كوباية خل ترشيها جوه الغسالة قبل ما تشغليها مباشرة. الخل دوره الأساسى التعقيم و قتل اى جراثيم ممكن تكوّن عفونة او ريحة. تانى حاجة، الخل مع المياه السخنة هيقضى على كل الترسبات و يفتح اى رشاشات مسدودة.
الغسلة دى تبقى الغسالة فاضية تماماً ماعدا من الأكسسوارات بتاعتها و تشغليها على اسخن بروجرام. لما تخَلص متفتحيهاش على طول اديها نص ساعة عشان البخار اللى محبوس جواها يشتغل تماماً.

 

نضفى الغسالة مرة شهرياً: كفاية اوى. حتى لو بتحرصى ان الأطباق ميبقاش فيها بقايا اكل قبل ما تحطيها. العناية الدورية هتحافظ على الغسالة كأنها جديدة و اهم حاجة انك مش هتضطرى تغسلى الأطباق تانى بعد ما تتطلع من الغسالة.

1 reply on “ازاى تنظفى غسالة الأطباق؟”

Leave a Reply

Your email address will not be published. Required fields are marked *