Categories
في البيت

ازاى تغسلى الجزم فى البيت

غسيل الجزم مش بس بيحافظ على الجزمة و بيطول عمرها، النضافة الدائمة للجزم من جوه بتمنع تكون الفطريات اللى بتعمل ريحة. ده بغض النظر عن ان شكلها بيبقى اجمل اكيد.

اول و اهم حاجة تبتدى بيها انك تعرفى الجزمة ممكن تدخل الغسالة ولا لأ. معظم الجزم القماش ممكن تتغسل. طبعا الجزم الجلد و الشامواه مينفعش تتعرض لكمية المياه الكبيرة دى.

تنضيف الجزم جزمة

هنبدأ التنضيف بقى. نفضى نعل الجزمة من اى حاجة ماسكة فيه. خاصة لو عليه لبانة او نعل الجزمة مليان طين. مش عايزين الحاجات دى تسد الغسالة. لو رباط الجزمة متوسخ جدا ممكن تفكيه قبل الغسيل و تغسليه لوحده.

فى كيس مخدة قديم او اكياس غسل الشرابات حطى الجزمة و النعلين فى ظهر بعض. و مهم ان الحاجة اللى هتحطى الجزمة فيها تكون ضيقة عليها، عايزين نقلل من حركة الجزمة جوة الغسالة عشان تتغسل كويس.

بطّنى الغسالة من جوة بملايات او فوط و حطى الجزم فى النص. هتعملى كدة عشان الجزمة متأذيش حلة الغسالة و تخبط فيها جامد. عامة متكتريش عن 3 جزم فى الغسلة الواحدة.

هتحطى الصابون فى الغسالة عادى و تشغليها على غسلة خفيفة. حرارة باردة و شطف مش عنيف. دورة الغسالة و الصابون كفاية انهم ينضفوا على غسلة خفيفة.

يفضل لو تستخدمى منظف سهل فى الشطف. زى البرسيل او الايريال الجل. البودرة بتبقى اصعب و بتسيب بقايا واضحة لونها ابيض لو متشطفتش كويس، خاصة على الجزم السودة.

بعد ما الجزم تطلع من الغسالة حطيها فى مكان فيه تهوية كويسة و بعيد عن الشمس. اوعى تنشرى الجزم على الحبل. الشمس بتخلى لون الجزم يبهت، الأسود هيبقى رمادى. و التعليق على الحبل بيبوظ قماس الجزمة و بيمطه.

اتأكدى انك فاتحة الجزمة كويس عشان الهوا يدخل فيها و ينشف البطانة تماماً. الجزمة فى الصيف ممكن تنشف فى خلال 24 ساعة، حسب سمك قماش الجزمة برضه.