Categories
في المراية

ازاى تصاحبى حماتك؟

حماتك مش مامتك، و مامتك مش أم جوزك! دى الحقيقة العلمية لكن بما أن انتوا اتجوزتوا و بتعتبروا نفسكم واحد مفيش فرق و عايشين فى بيت تحت سقف واحد و فيه ورقة دليل على الكلام ده يبقى ساعتها حماتك هى مامتك و حماة جوزك تبقى مامته!
وعلى رأى مامتى دايماً تقولى ان الجواز ده مش اتنين و بس هيعيشوا فى كهف لوحدهم، الجواز ده عيلتين كاملين بيتحولوا لعيلة واحدة.

  • اتعرفى عليها كويس هتلاقى الدنيا أسهل كتير و متنسيش ان هي انسانة زيك بتزعل و تتعصب و وارد تغلط طبيعى. ده مش مبرر نقف عند كل كلمة، لأ خليكى واقعية شوية الدنيا مش وردى وردى. بس لما تعاشريها فترة و تعرفى طباعها ممكن تكتشفى أن هى عصبية عموماً مش قاصداكى أنت لشخصك. يبقى تستحمليها وهى هتحترم ده فيكى و تقدرك.
  • حبيهم كلهم مش حماتك بس. صاحبى اخت جوزك و عاملى أخوه كويس و حماكى و خالته و جدته و العيلة كلها. تبقى ضربتى عصفورين بحجر، أولاً طبيعى هتتبسط منك لما تلاقيكى قريبة من كل الناس اللى بتحبهم و هما كمان هيشكروا فيكى قدامها و من وراكى، مفيش أحسن من كده!
  • شاركيها الأنشطة المختلفة زى لف محشى ورق العنب أو تقطيف الملوخية هتحبك موت ساعتها. طبعاً بهزر، ده مش الأساس، بس مايمنعش تعملى كده طبيعى لو عندها فى البيت تقومى تساعدى فى تحضير الغداء و غسل المواعين مش عيب. بس لو هى بتحب الخروج اخرجوا سوا، ممكن تشاركيها الزيارات العائلية، أنتى بقيتى واحدة منهم. و لو بتحب التلفزيون استحملى المسلسل التركى و برنامج الشيف شربينى.
  • متدخليش عليها ابداً ايدك فاضية. تهادوا تحابوا. حتى و لو بأبسط الحاجات ممكن تعملى حاجة حلوة فى البيت كيك مثلاً و تاخديها معاكى. افتكريها و أنتى بتشترى طلباتك لو هى كمان فيه حاجة ناقصاها تفاجئيها بيها و تحس باهتمامك و تردهالك. الهدايا عموماً نوع من انواع الحب الراقى دايماً حافظى على وجوده مابينكم.
  • منطق “أبعد حبة تزيد محبة” مش مقصود بيه البعد و قطع صلة الرحم، لكن انكم تتعايشوا مع بعض بس من غير تدخل فى الشئون الخاصة بأى حد. و ده كتير بيكون هو الحل لما القرب زيادة يعمل مشاكل. بمعنى انى مش عشان بقيت واحدة من العيلة احشر مناخيرى فى كل كبيرة و صغيرة، لازم اسيب مساحة حرية للى حواليا عشان محدش يتضايق منى.
  • مش هقولك عامليها زى مانفسك مرات ابنك فى المستقبل تعاملك. سيبك من الجاى و خلينا فى دلوقتى، لو انت بتحبى مامتك و نفسك جوزك يعاملها حلو يبقى ابدائى بنفسك و عاملى حماتك كويس و حبيها عشان تتردلك فى ساعتها.
  • خليكى حمامة السلام. لو جوزك زعلان منها فى حاجة أو عنده مشكلة مع أى حد فى العيلة حاولى تصالحيهم أو حتى تهديه من ناحيتهم عشان هما كده و لا كده هيتصالحوا فى الأخر فمتطلعيش أنتى الوحشة.
  • ماتتكسفيش تقعدى جمبها تتكلموا و تحكوا، تتبادلوا وصفات الأكل، أفكار للتنضيف. كمان تتعرفى أكتر على جوزك و هو صغير كان بيحب ايه و بيعمل ايه هتلاقيها بتحكيلك و هى سعيدة جداً.
  • لازم تعرفى أن جوزك اتجوزك بعد ما حبك لكن عيلته لسه ماتعرفكيش، عشان كده لازم تعملى شوية مجهود فى انك تخليهم يحبوكى و يعرفوكى بجد. الموضوع ممكن يبان صعب بس بشوية ذكاء هتلاقى الموضوع سهل و يستاهل فعلاً.

Leave a Reply