Categories
Featured في المراية

ازاى تصاحبى جوزك

جوزك اختارك و حبك و اتجوزك و فى الغالب سكنتوا فى مكان بعيد عن أهلك و صحابك.
فى الأول هتبقى بتكتشفى الدنيا الجديدة معاه و مبسوطة بالبيت الجديد و حاجاتك الجديدة. بس بعد شوية ممكن يبتدى يجى الملل و الزهق.

 

سيبيه يتنفس
على فكرة جوزك زيك بالظبط ده اذا ماكنش أكتر منك، بعده عن منطقته و قهوته و صحابة اللى كان بيشوفهم كل يوم تحت أى ظروف أكيد بعد شوية هيفرق معاه و هيبقى عايز يروح لهم. متحبكيهاش و سيبيه يروح بس فى الأول يغديكى بره مثلاً، و بعدين روحى اسهرى عند مامتك، قابلى صحابك أو جمعى أخواتك فى نفس اليوم. المهم أنتى كمان تشوفى حاجة تعمليها فى الويك اند و ظبطوا مع بعض عشان متزهقيش و متزهقيهوش و كل واحد ياخد حقه و يتبسط.

 

شاركيه هواياته

لو جوزك بيحب يتفرج على الكورة و هيقعد يتفرج فى البيت ده فى حد ذاته انجاز يشكر عليه. كل المطلوب منك تهيئي جو لذيذ عشان متبقاش آخر مرة يعملها. و بلاش أسئلة يعنى ايه أوفسايد و هجمة مرتدة و تشيلسى اللى لابس أبيض ولا أزرق؟!!
حوشى اسئلتك بعدين عشان طول ما الماتش شغال هو غير مهتم بأى حاجة بتقوليها. لكن هيبقى مبسوط أوى لو قمتى عملتى شوية فشار أو سندويتشات مع بيبسى كده او تطلبى بيتزا و ميضرش تهيصى معاه لما الفرقة اللى بيشجعها تجيب جون.

 

الأكل
مش لازم عشان متجوزين و بناكل فى البيت يبقى كل يوم طبيخ و رز و لحمة. حاولى تعملى اكل زى اللى بتاكلوه بره، مثلاً هاتى شواية و اعملوا باربيكيو داى، اعملى برجر و بطاطس أو بيتزا.
المهم بلاش السؤال بتاع تاكل ايه بكرة؟ فاجئيه أو اقترحى عليه أكلات يختار منها.
اخرجوا كلوا فى أماكن عشوائية مع بعض. مافيهاش حاجة لو كلتوا من على عربية فول أو طلبت معاكوا تاكلوا كبده و مخ بعد نص الليل!

 

السوبر ماركت
اشتروا حاجات البيت سوا و ده هيسهل عليكى وقت الطبخ عشان لما يختار الأكل بنفسه تعمليه و أنت متطمنة انه هياكله.
و كمان نكون حلينا مشكلة مصروف البيت بيقضى ولا ميقضيش، عشان ساعتها الراجل بيبقى موجود و شايف الأسعار بنفسه مش متخيل انه بيدى لمراته الملايين و هى مبتبطلش طلبات. و برضو نشترى على قد حاجتنا و بس لحد ماتخلص ننزل نشترى غيرها و نركز على الأساسيات عشان نقدر نحوش. الراجل عموماً بيحب الست الموفرة أو حتى اللى تحسسه انها بتوفر.

 

حس بيا يحس بيك ربنا

جوزك بيتعب و بيشقى فى الشغل عشانكوا و بيتاخر فى الشغل غصب عنه مش بيدلع. لما يجى البيت ياريت تضحكى فى وشه الأول و بعد كده احكيله كل مشاكلك مع الولاد و تعبك فى البيت ساعتها هيقدرك أكتر مش هيحس انك نكديه و بتكملى عليه يومه المتعب بعد الشغل.

 

اديله برستيجه
و حسسيه انه سوبر مان و مافيش منه اتنين و ده حقيقى طبعاً على الأقل بالنسبة لك مش هتلاقى حد فى الدنيا بيستحملك اده فى زعلك و تعبك فى حملك و هروموناتك الملخبطة.

 

خليكى زى صاحبه الراجل
زى كده لما أنتى بتبقى عايزة ترغى و تفضفضى بتبقى عايزة جوزك يتحول لخالتى اللتاتة و تديها حكايات للصبح. فى المقابل لما تلاقيه متضايق أو عنده مشكلة فكرى معاه فى حلول عملية، دى مش دعوة للندب و فتح باب النصايح اللى فات وقتها. عمرك شوفتى واحد مسك صاحبة يأنبه على أى حاجة غلط عملها. لأ بيجبهاله بطريقة غير مباشرة و بالهزار. لو مش عايز يتكلم دلوقتى اديله مساحة لنفسه و هو يرجع يحكى و يتكلم من نفسه لما يهدى.

 

انسوا انكوا متجوزين. انسوا التقاليد اللى ملهاش أى تلاتين لازمة و متعملوش حساب للناس و كلام الناس.. المهم انتوا و سعادتكوا و بس!

Leave a Reply