Categories
Featured مع العيال

ازاى تشجعى ابنك يأكل أحسن

لِسَّه مقابلتش ام واحدة راضية عن اكل ولادها. دايما نفسنا ياكلوا أحسن، اكتر و يهتموا بالأكل المغذى.

دول ٩ حاجات ممكن تعمليهم يشجعوا ابنك او بنتك انهم ياكلوا أحسن.

١. شجعى الطفل يأكل لوحده: الأطفال بيحبوا يحسوا انهم بيعملوا إنجاز. و ده تشجيع نفسى كويس كمان. شجعى طفلك انه يأكل لوحده. احساس المغامرة و حبه للاستكشاف هيشجعه اكتر. ممكن تستعملى غطا السفرة البلاستك، موجود فى كل السوبرماركت، تفرديه تحت الطفل عشان يعيش براحته و انتى متنضفيش بعده. ابدأى بالأكل بالايد و مع تقدم السن دخلى أدوات الاكل تدريجياَ.

٢. نوّعى فى قوام الاكل: خطوة بتفرق جداً خاصة لو الطفل تحت سن السنة. المهم اولاً استعداد الطفل انه يأكل اكل مش مضروب فى الخلاط. ممكن تبدأى تهرسى كمية بسيطة بالشوكة و بين صوابعك و تجربى. للسن الأكبر نوعى فى قوام الوجبة، ممكن تدخلى مع الزبادى مثلاً فاكهة، مع الخضار تقدمى حاجة بتقرمش زى الفراخ المحمرة فى الفرن.

٣. خلى شكل الطبق مشهى: الكبار نظرتهم مختلفة تماماً عن الأطفال فى الحتة دى. ارسمى أشكال بالأكل فى الطبق. ممكن تعملى جبل من الرز و الملوخية تبقى كأنها البحر حواليه. شغلى مخيلتك و مخيلة طفلك. ممكن تدخلى الألوان الطبيعية مع بعض الأكلات. البانكيك دى ممكن تدخلي عليها نقطة من اللون المفضل لطفلك. و زينيها على شكل وردة او شجرة بالعسل او الكريمة.

٤. غيرى فى أدوات الاكل: لو تلاحظى ان كل أدوات اكل الأطفال بتيجى فى ألوان صريحة و قوية. اشترى مجموعات ألوان مختلفة و غيرى فى لون المعالق او الاطباق كل فترة و اهو منها تعلميه الألوان برضه. ده لأن ساعات الطفل بيزهق من نفس منظر الاكل فى نفس الطبق و المعلقة. التجديد مطلوب برده.

٥. اللغوصة: دى مختلفة عن انه يأكل لوحده. دى هدفها الأساسى اللعب. مش معناها اننا بنشجع ان الطفل يلعب بأكله، بالعكس. احنا هنا هنحاول نقوى علاقة الطفل بالأكل بأننا نربطه باللعب. سيبيه يلعب بالرز اللى مش عايز ياكله. سيبيه يستكشف و يتعرف عليه. المرة الجاية هياكله.

٦. متيأسيش. متتعصبيش: امهات كتير بتتعصب و تاخد الطبق و تمشى و هى زعلانة او تتعصب ان الطفل مكملش أكله. مش بتشجعيه كده على فكرة. الطفل هيعتقد حاجة من اتنين. انه عمل حاجة غلط و هتربطى وقت الوجبة بإحساس بالذنب و نكد. او انه هيضحك عليكى ببساطة و مش هتوصلوا لحاجة. سيبي الطفل براحته و جربى معاه تانى كمان ربع ساعة.

٧. وقت الوجبة ده وقت ترفيهي: لو طفلك اقل من السنة يبقى تقضوا وقت الوجبة تكلميه عن مكوناتها، الوانها، تحكى حكاية و تخلى الطفل مركز معاكى و مع الاكل. السن الأكبر، يتعود اننا نحكى اللى حصل فى الحضانة او نتكلم عن الحيوانات او اى موضوع الطفل بيحبه.

٨. وقت العائلة: أطفال كتير بتتشجع انها تاكل لما بيلاقوا ان اللى حواليهم بياكلوا كمان. و مهم كمان ان يبقى فيه على الأقل وجبة واحدة فى اليوم بتتجمع العائلة كلها فيها. حضرى وجبات أطفالك كلهم و افطروا مع بعض. احرصى ان الطفل يتعود يأكل وسطكوا و يتعود انه يشارك فى وقت العيلة.

٩. تحايلى على الطفل شوية: مش عايز يأكل الكوسة؟ عادى، دخليها فى صوص المكرونة او اخلطيها مع خضروات تانية عشان يوصله الغذا اللى محتاجه. و سيبيه ينساها و متتخانقيش معاه زى ما قولنا فى رقم ٦. قدميها تانى بعد كام أسبوع و اعملى منها حاجة مسلية و جديدة.

١٠.الأطفال بطبيعتهم بيحبوا يقلدوا: استغلى الموضوع ده و هما لما يشوفوكى بتشربى لبن مثلاً هيقلدوكى. و عادى ان ابنك يزهق من الكوباية اللى عليها ميكى بتاعته و يبقى عايز يشرب فى مج زيك.

Leave a Reply