Categories
9 شهور

ازاى تشترى هدوم للبيبي

مبروك!

اول حاجة عملتها اول ما عرفت أنى حامل ان نزلت اشتريت لبس للبيبي. طقم ابيض سادة، سالوبيت و غيار داخلى و طاقية و شراب و جوانتى. كله ابيض. كنت فرحانة بيهم جداً. و مع كل مرة كنت بأنزل اشترى هدوم للبيبي كنت باتعلم شوية حاجات. دى خلاصة ٨ شهور شوبينج.

١. القطن: الأطفال عامة بشرتهم حساسة و ضعيفة. ركزى مع الملابس القطنية. 100% قطن هو احسن حاجة و ابعدى تماماً عن الاقمشة المصنعة. القطن ناعم بطبيعته، افركيه بين صوابعك، كل ما يبقى انعم يبقى احسن عشان كمان ميرهقش بشرة البيبي و يسبب حساسية او التهابات. القطن كمان بيدفى كويس فى الشتا و بيمتص العرق و خفيف على الجلد فى الصيف.

٢. الكباسين: البيبي فى الأسابيع الأولى بيبقى عظامه لسه ضعيفة و بنبقى خايفين أصلاً نشيله. هاتى هدوم 0-3 كلها بكباسين من اول الرقبة للرجلين. عشان متتعبيش و انتى بتحاولى تدخلى راس البيبي و خايفة على رقبته و راسه الطرية. الكباسين اللى فى الرجلين هتسهل الغيار و خاصة فى الشتا. كل ما تبقى الهدوم بتتفرد قطعة واحدة و ممكن تشيلى البيبي و تنيميه جواها على طول يبقى احسن اكيد، مجرد انك تقفلى الكباسين و تبقى خلصتى. الاطفال فى اول شهر بالأخص بيغيروا كتير لأن مش كلهم بيبقى مقاس الحفاض مظبوط عليهم لسه و بيسرب احياناً.

٣. اعرفى انتى ناوية تغسلى كام مرة فى الأسبوع: فكرى كده لو ناوية تغسلى مرة فى الأسبوع يبقى اعملى حساب 2-3 اطقم فى اليوم. لو هتغسلى مرتين فى الأسبوع يبقى تقسمى العدد على اتنين.

٤. ركزى مع الفصول: معلش هى حسبة شوية بس متشتريش لبس شتوى و سميك لو هتولدى فى الصيف. استنى لما الصيفى ينزل. لو عايزة تشترى شتوى بدرى يبقى احسبى عمر البيبي هيبقى قد ايه على دخول الشتا.

٥. نوع البيبي: اشترى بعد ما تعرفى نوع البيبي. بس برده ميمنعش انك تبصى الناحية التانية فيها ايه. ممكن تلاقى درجات جميلة للأزرق فى ناحية الولاد او اصفر محايد فى ناحية البنات. استغلى ان القصة بتبقى واحدة و نوّعى للبيبي.

٦. ابتدى بالأساسيات: متنزليش تشترى و انتى مش عارفة عندك ايه و ناقصك ايه و بالعدد كمان. ركزى انك تخلصى الأساسيات زى الهدوم الداخلية و السالوبتات قبل ما تجيبي اطقم خروج او جزم.

٧. الخصومات: استغلى الخصومات و العروض اللى المحلات بتعملها طول فترة حملك. ممكن تشترى حاجات اكتر بنفس البدچت. بس متحوشيش هدوم فصل مش هتولدى فيه عشان الخصومات نزلت، انتى حامل 9 شهور يعنى هيعدى عليكي كل الفصول. الأحلى من الخصومات الموسمية هى العروض. ممكن تتابعى محلاتك المفضلة على الأنترنت و تشترى كل حاجة تقريباً ارخص.

٨. قارنى: لفى لفة كده الأول حتى قبل ما تعرفى نوع البيبي و قارنى بين المحلات فى نوعية الأقطان، الماركات المتوفرة، الأسعار و التشكيلة قبل ما تقررى هتشترى منين.

Leave a Reply

Your email address will not be published. Required fields are marked *