Categories
في البيت

ازاى تستفيدى من مساحة الفريزر لاقصى حد

اكتر حاجة صحية هى انك تستخدمى الخضار و الفاكهة فى موسمها. طب و فى غير الموسم؟ طلعى من الفريزر! بس لازم تراعى شوية نقط فى تخزين الخضار و الفاكهة فى موسمها عشان تحافظ على قيمتها الغذائية و متخسريش لونها و قوامها كمان. ممكن تقرأى عن طرق حفظ انواع الخضار و الفاكهة المختلفة من هنا. بس دلوقتى هنتكلم عن طرق التخزين عشان متلاقيش نفسك بتشربى مانجو طعمها توم.
استخدام الفريزر مش مقتصر بس على التخزين فى الموسم. بالعكس هو افضل من التلاجة فى حفظ بواقى الأكل او الكميات اللى فايضة عن الحاجة.

و اتنى بتستخدمى الفريزر خلى فى بالك اهم نقطتين: المساحة المتاحة عندك و الوسائل الافضل للأستفادة بيها.

١. تجمدى فى اكياس مسطحة: الأكياس المحكمة الغلق هى افضل طريقة لحفظ السوائل بالأخص. انا بحب اشيل شوربة الفراخ اللى زيادة عن حاجة وجبة اليوم، بدون ملح، عشان تبقى مناسبة مع اى نوع خضار. كان دايماً عندى مشكلة ان كيس الشوربة بيتحول شكله لكورة او شكل ثمانى خزعبلى ابقى مش عارفة اطلعه من الفريزر اصلاً! الحل انك تخصصى مكان فى الفريزر فيه علبة او طبق مربع تفردى فيه الأكياس لحد ما تتجمد و هى مفرودة عشان تحافظ على شكلها مسطحة، كده ممكن تحفظيها جنب بعضها او فوق بعض و توفرى مساحة.

٢. تستخدمى علب مربعة او مستطيلة: لو العلب بلاستك يبقى تتأكدى انها مناسبة للتخزين فى الفريزر. و لو ازاز تراجعى درجة الحرارة اللى ممكن تستحملها. ليه بقى علب مربعة او مستطيلة؟ ببساطة لأن شكلها بيقلل من المساحة المهدرة. خاصة لو هتستخدمى علب من نفس المجموعة، هيبقى سهل انك ترصيهم فوق بعض.

٣. تستخدمى أماكن التخزين فى الفريزر صح حسب العلامات: افتحى الفريزر بتاعك كده و بصى، هتلاقى انه متقسم جاهز و متنظم. الفكرة ان ده بيبقى حسب توزيع البرودة فى الفريزر فالشركات المصنعة بتقول لك ايه الاماكن الأفضل للتخزين. انا ببص لها من ناحية تانية، بدل ما اقعد ادور في الفريزر على حاجة، ببقى عارفة ان ده مكان السوائل و ده مكان الخضار و بيبقى الفريزر منظم احسن.

٤. تخصصى مساحة للحاجات اللى هتتجمد جديد او هتفكيها قريب: فاكرة لما اتكلمنا فى اول نقطة عن العلبة اللى هتحطى فيها الأكياس الجديدة؟ هى دى. ممكن كمان تستخدميها انك تحضرى فيها الحاجة اللى ناوية تخرجيها من الفريزر قريب. انا مش بأشيل العلبة دى من الفريزر، حتى لو فاضية.

٥. تعملى يوم فى الاسبوع تفضى فيه بواقى من الفريزر: ما هى الحاجة مش هتعيش فى الفريزر للأبد!لازم تبقى عارفة الحاجة اتحطت فى الفريزر امتى وتستخدميها قبل ما تبوظ. فيه يوم فى الأسبوع عندى بيبقى للبواقى: بواقى اكل الأسبوع من التلاجة مع اللى تاريخ صلاحيته قرب من الفريزر و اطبخ خفيف اليوم ده و اسهّل على نفسى.

٦. اكتبى التاريخ على كل حاجة بتجمديها: ده عشان النقطة اللى لسه متكلمين فيها فوق. تاريخ صلاحية الحاجة اللى بتتخزن فى البيت مهم بالظبط زى تاريخ صلاحية اى حاجة بتشتريها. اكياس حفظ الفريزر بيبقى فيها مكان مخصص للكتابة و بالنسبة للعلب ممكن تستخدمى ستيكر، بيبقى فيه انواع برضه مناسبة للتلاجة و الفريزر تقدرى تشيليها بسهولة او تمسحى الكتابة اللى عليها

٧. تستخدمى علب و اكياس شفافة عشان تشوفى جواها ايه و متتنسيش: اكيد الأكياس الملونة شكلها حلو و ممكن تتخيلي انها احسن فى التنظيم. لكن عن تجربة، بقيت مش فاكرة الأكياس دى فيها ايه و نسيت الألوان خصصتها لأيه و بقيت اكسل استخدمهم بدل ما اتفاجئ. الأكياس الشفافة التقيلة المناسبة للتخزين فى الفريزر هى الأفضل. و ابعدى عن استخدام اكياس السندويتشات العادية لأنها مش مصممة للأستخدام مع حرارة الفريزر و ممكن تتفاعل مع الأكل، ده غير انها بتتقطع بسرعة.

٨. تخزنى كميات معقولة: ده لو انتى هتخزنى من الخضار و الفاكهة الموسمية، مش هتشيلي 7 كيلو ملوخية، اكيد هتستخدمى اقل. حاولى تخزنى كميات معقولة، تكفيكي من الموسم للموسم بس، و متنسيش ان الخضار الزيادة عن الحاجة فى الآخر بيترمى، تبقى انتى الخسرانة. ده الى جانب انه هيشغل مساحة كبيرة فى الفريزر هتقيدك جداً لو حبيتي تخزنى حاجات تانية.

٩. اعرفى الفرق بين الفريزر و الديب فريزر: اكيد انتى عارفة امكانيات كل واحد. هنا اقصد تبقى عارفة كل حاجة مكانها فين. يعنى المنطقى ان المأكولات اللى هتتخزن مدة طويلة تروح الديب فريزر. على عكس الشوربة اللى هتستخدميها فى الطبخ الفترة الجاية او الآيس كريم. ده للتنظيم و عشان تعرفى تستفيدى بالأتنين لأقصى حد.

١٠. تعملى ورقة باللى فى الفريزر: انا بأعمل جرد شهرى سريع كده للفريزر و التلاجة و دولاب الخزين. طبعاً ان يبقى فيه ورقة على باب الفريزر باللى فيه بتوفر وقت و مجهود. و اكيد الجرد الشهرى مع المنيو الأسبوعى بيساعدونى جدأ انى اوفر فى ميزانية السوبرماركت.

Leave a Reply