Categories
في المطبخ

ازاى تخزنى الأكل فى الفريزر

الخضار و الفاكهة أكيد بيبقى طعمهم أحلى فى الموسم. و الأحلى كمان ان استخدام المواد الكيميائية بيبقى اقل لما تتزرع فى موسمها، يعنى أأمن كمان. استغلى المواسم و خزنى كميات تكفيكى للموسم إللى بعده. مش لازم ٦ كيلو من نوع واحد. على حسب استهلاكك الشهرى من كل نوع.

 

البروكلى و القرنبيط و الفاصوليا و البسلة و البامية: هيتنضفوا كأنك هتطبخيهم. و بعدين كل نوع خضار لوحده تنزليه فى مياه بتغلى لمده دقيقتين. تصفيه و تنزليه مباشرة بعدها فى مياه بثلج عشان توقفى عملية الطبخ فتحافظى على كل الفوائد اللى فى الخضار و يفضل لونه اخضر. سيبيه لحد ما يتصفى تماماً من المياه قبل ما تقسميه فى اكياس و تدخليه الفريزر.

 

الليمون: هتغسلى كمية الليمون اللى عندك كلها و فى عصارة البرتقال و تحولى الليمون لعصير. صبى الليمون فى مكعبات تلج و جمديها. لو كمية الليمون كبيرة ممكن تنقلى مكعبات التلج لأكياس بعد ما تتجمد على الأقل لمدة 8 ساعات. و تبتدى تجمدى مجموعة جديدة مكانها.

 

الثوم: ناس كتير متخيلة ان الثوم مش بيعيش فى الفريزر، بالعكس بيفضل طازة و بيحافظ على نكهته لو أتجمد صح. الجزء الصعب هو انك لازم تفصصى الثوم و تنضفيه. قدامك اختيار من اتنين، انك تحفظى الثوم فصوص كاملة او تفرميه. فى الحالتين هتدخلى الثوم فى اكياس محكمة الغلق و بعدها تحطيه فى علبة. الثوم جواه مياه و احنا مش عايزين المياه دى تتحول لتلج، عايزين نجمد الثوم و هو محافظ على قوامه مش المياه بس. و كمان مش عايزين ريحة الثوم تنتشر فى الفريزر. الحفظ فى كيس بعدين علبة هيمنع انه يفقد قوامه.

 

السبانخ: هتغسليها و تقطعيها كأنك هتطبخيها دلوقتى. ممكن تحفظى السبانخ سادة بأنك تنزليها فى المياه المغلية و بعدها المياه المثلجة زى بقية الخضروات، دى سبانخ ممكن تستعمليها فى الحشو او تطبخيها بصلصة بعدين. او تحفظيها مطبوخة تماماً و جاهزة على التسخين بس.

 

الطماطم: انا بأفضّل انى احول الطماطم لصلصات مختلفة و احفظها فى برطمانات زى الجاهزة. هتبتدى بفرم الطماطم بدون القشرة. صلصة الطماطم اللى هتضيفيها للطبخ هتديها غلوة على النار مع ملح و فلفل بس. صلصات المكرونة هتضيفي عليها ثوم مفروم و ريحان. استنى الصلصة تبرد و بعدين صبيها فى برطمان او كيس و اكتبى عليه نوع الصلصة.

 

الكوسة: هتحددى الأول انتى هتستخدميها فى ايه. انا بحب اضيف الكوسة المبشورة رفيع للصوص، بتدوب و بتختفى فيه. على الأساس ده بحدد، مبشورة او مقطعة حلقات او مقورة. طبعا هتعامليها زى بقية الخضار و هتنزليها فى المياه المغلية و بعدها الثلج.

 

الخرشوف: هتنضفيه و تحتفظى بالجزء اللى هتطبخيه بس. المرة دى هتضيفي لمياه الغلى و المياه المثلجة عصير ليمون عشان يحافظ على الخرشوف من تغيير لونه.

 

الملوخية: هتحضريها للطبخ، تتغسل و تتنشف و تتفرم. تبتدى طبخها فعلاً مع الشوربة و توقفى قبل اضافة التقلية. وقت ما تحتاجيها اعمليلها تقلية طازة. استنيها تبرد قبل ما تقسميها فى اكياس و تجمديها.

 

البطاطس: لو هتستخدميها فى الطبخ يبقى هتديها نص سلقة زى بقية الخضار. لو للقلى يبقى هتقليها لمدة دقيقة واحدة و تصفيها من الزيت تماماً و تسيبيها تبرد قبل ما تدخليها الفريزر على صينية. لما تتجمد حطيها فى كيس زى الجاهزة بالظبط.

 

الأعشاب العطرية: زى الريحان و النعناع و المريمية و الزعتر. لازم تبتدى بأعشاب طازة و مش مجففة. و تبقى ناوية تستخدميها فى الطبخ بس. هتقطفى الأعشاب و تتأكدى انك اتخلصتى من الأغصان. حاولى تحافظى على الأوراق كاملة عشان تحتفظ بالزيوت العطرية جواها. فى مكعبات الثلج ابتدى رصى الأعشاب، لو حابة ممكن تخلطيهم. و بعدين تصبى فوقهم زيت زيتون او زبدة سائلة و تجمديهم. لو هتستخدمى زبدة، حاولى انها تبقى باردة على قد ما تقدرى عشان متدمرش الأعشاب. طلعى مكعب و ضيفيه للأكلة وقت ما تحتاجيه.

2 replies on “ازاى تخزنى الأكل فى الفريزر”

[…] الفريزر: مش للمجمدات بس، لبواقى الاكل اللى انتى عارفة انها مش هتخلص اليومين اللى جايين. و للعيش و الخضار.  اعرفى اكتر عن تخزين الخضار من هنا . […]

Leave a Reply

Your email address will not be published. Required fields are marked *