Categories
9 شهور

ازاى تخرجى من اكتئاب ما بعد الولادة؟

الموضوع ده بالذات مش عايزاكى تسمعى كلام حد فيه! عيشى تجربتك بنفسك و قررى من أول يوم هتعملى ايه. أنت و بس اللى فى ايدك القرار الأول و الأخير و محدش هيساعدك من نفسه. عايزة تعيشى من أوضة النوم للحمام ولا من الرضاعة لتغيير البامبرز و تدخلى فى اكتئاب و احساس بالوحدة و تكرهى حياتك و تجيلك أفكار سوداء زى ايه اللى خلانى اتجوز اصلا ًو اعمل فى نفسى كده؟!

انسى كل الكلام ده و ركزى على نقطة الخروج. الخروج عموماً، مش مقصود بيه الخروج من البيت بس، لأ هو الخروج من شكل الأم التقليدية الممل لأم نشيطة و مرحة و مقبلة على الحياة الجديدة و متحمسة كمان.

• ابد ائى بنفسك فى الأول و اهتمى ببشرتك و جسمك عشان ترجعى زى الأول و لو محتاجة تعملى ريجيم ابدائى فوراً.

• اشترى لبس جديد و روحى الكوافير، متنسيش نفسك !

• نامى كل ما البيبى ينام أو اعملى فنجان قهوة مع شوكلاتة و خدى بريك من كل حاجة، البيت و الطبخ و التنضيف يتأجلوا، المهم أنتى مزاجك يكون رايق لتحمل الطفل من غير عصبية و تعب. متفكريش ان حد هيلومك على تأجيل شغل البيت، الكل عارف انك سهرانة مع البيبى طول الليل و الأفضل يساعدوكى.

• اطلبى من مامتك أو أختك تخرجوا تتعشوا برا بدل البيت. هتستمتعى بوقتك و فى نفس الوقت هتلاقى حد يشيل معاكى البيبى و هو مبسوط و على قلبه زى العسل.

• روحى السوبر ماركت بنفسك. بس بلاش الويك اند عشان الزحمة ماتضايقش البيبى و اشترى حاجتك بنفسك. أول ما تحسى البيبى تعب حاسبى و امشى.

• اخرجى فى مول أو أى مكان فيه غرفة تغيير للأطفال changing room-babies room)) بيكون فيها كراسى لو هتقعدى ترضعى و ترابيزة لتغيير الحفاضات (changing table) و حوض و دى موجودة مثلاً فى ايكيا و متتكسفيش تسألى على مكانها. هى معمولة عشانك !

• اتفقى مع جوزك تسافروا تغيروا جو فى أى مكان. على فكرة هو كمان زيك و محتاج تغيير. هتفرق معاكوا جداً وهترجعوا عندكوا طاقة ايجابية تكملوا بيها.

• متنسيش صحابك و خليكى دايماً على اتصال بيهم و لو مش قادرة تروحى لهم، ممكن هما يجولك و تعزميهم على أكل جاهز أو أى حاجة سريعة تعمليها و كلوا فى أطباق و كوبايات بلاستيك و ارميها و ريحى دماغك. مش هتفرق معاهم لو صحابك بجد، المهم تتقابلوا !

• أكيد من قبل الولادة جبتى سترولر و كار سيت. دول مش للبيت! انزلى و استخدميهم، ممكن حتى تنزلوا تلفوا بالعربية و تشربوا عصير أو تاكلوا ايس كريم و تروحوا. حلو برضه وماله أحسن من مفيش! خدى بالك ساعة شراء السترولر تبقى خفيفة و بتفتح و تقفل بسهولة. و كمان الكارسيت عشان تعرفى تتعاملى معاهم بسهولة لو كنتى لوحدك.

• دايماً تبقي مجهزة شنطة البيبى تحسباً لأى خروجة متتفجأيش ان الهدوم عايزة تتغسل أو ان مافيش بامبرز كفاية.

• جهزى رضعة او اكلة لما البيبى يبتدى يأكل، دايماً من الصبح بدرى، مش هتخسر فى حاجة حتى لو قاعدين فى البيت.

 

لنفترض مش هتقدرى تعملى أى حاجة من دول

• املى البيت سعادة و فرحة، لما جوزك يرجع من الشغل احكي له يومكم كان عامل ازاى و الحركات الجديدة اللى البيبى اتعلمها.

• حضرى عشاء لطيف و قدميه بشكل جديد مثلاً فى الأطباق و الكاسات من النيش، البسى فستان شيك و اخرجوا اتعشوا فى السفرة كتغيير و فى نفس الوقت البيبى تحت عينكوا.

• نزلوا فيلم جديد من على الأنترنت و اعملوا (movie night) مع شوية فشار و عصير بدل السينما و اهو لو البيبى عيط اعملوا Pause .

• احتفلوا بكل شهر جديد عدى على البيبى معاكوا يعنى مثلاً تم أربع شهور، سبع شهور، بصورة جديدة تصوروها له و هدية و لو حتى بالونة.

من الأخر اعرفى ان موضوع الأكتئاب ده هياخد وقته و ينتهى. المهم انك تقاومي و ماتستسلميش و تحمدى ربنا على أغلى نعمة بعتهالك.

Leave a Reply

Your email address will not be published. Required fields are marked *