Categories
9 شهور

ازاى تختارى كرسى السيارة او الكار سيت

من قبل ما أولد و انا واخدة قرارين كل اللى حواليا مش مقتنعين بيهم. البيبي هيروّح من المستشفى فى الكار سيت مش فى شيالة او كاريكوت و خاصة مش فى ايد حد. و ان البيبي هيقعد فى الكار سيت طول ما احنا فى العربية، همنع تماماً القعدة قدام و مستحيل على رجل باباه اثناء السواقة. انا عارفة ان مش كلنا بنعمل كده بس لو حصل اي حاجة، الطفل ده اضعف مننا و مش هيستحمل. انا خدت القرارات دى بدافع انى احمى البيبي و اوفر له امان بجد و احنا فى العربية.

بعتذرلك مقدما لو انا اتكلمت او هتكلم عن الحوادث. لكن ده واقع و هو ده الهدف الأساسى من الكرسى و مش بنجيبه عشان دلع و خلاص.

اول حاجة لازم الأمهات تعرفها ان الكار سيت بيتغير مع طول و وزن الطفل. اول مقاس بيعيش لأكتر من سنتين. و ده لازم يكون باصص لوراه يعنى البيبي يبقى مديكي ضهره. ده عشان يقلل احساس الطفل بحركة العربية و يمنع دوار الحركة او الـmotion sickness و تانى حاجة بيوفر حماية اكبر للطفل فى حالة الحوادث. تانى مقاس ممكن تبتديه من سن سنة و نص لو حابة و بيكمل معاكى لسن 7 سنوات. ده بيبص لقدام زينا و بيزيد عليه جزء اكبر عند الرأس عشان يوفر حماية اكبر للمنطقة دى. الأفضل طبعاً ان الطفل يقضى أطول فترة ممكن فى الوضع العكسى او الbackward facing. و المقاس الـتالت ده عبارة عن قاعدة بتتركب للطفل عشان حزام الأمان يتربط مظبوط عليه.

هتغيري المقاس اول ما رأس الطفل تخرج من الكرسى. كده بيبقى فقد خاصية الأمان بالأخص عند اهم منطقة، الرأس. ممكن تستغنى عن المقاس الـ3 لو حزام الأمان بيقفل على الطفل مظبوط.

فيه شوية خواص بقت موجودة فى الكار سيت حاولى تركزى معاها:

• نيوبورن سبّورتNewborn Support او مصمم لحديثى الولادة: مهم جداً انك تتأكدى ان الكرسى مصمم انه يدعم حديثى الولادة. فيه بعض الموديلات بتبقى لسن 6 شهور و ما فوق. لأن سن 0 – 6 ده بيبقى لسه عظمه ضعيف و مينفعش يقعد او يقعد لفترات طويلة حتى بعد سن 3-4 شهور. الـNewborn Support دى بتبقى قطعة بطانة بتركب فى الكرسى تحت الأحزمة و فيه جزء منها بيدعم رأس البيبي كمان عشان متتحركش كتير مع حركة العربية. و ممكن تشترى القطعة دى منفصلة، لكن تتأكدى انها مناسبة لموديل الكرسى و مش هتعيق أحزمة الأمان.

• الأحزمة: لازم تجربيها قبل ما تشترى. فكى و ركبى و غيري ارتفاعها و ضيقيها و وسعيها. اتأكدى ان المشابك كلها شغالة و مش صعبة عليكي. ربط الأحزمة صح هو اهم جزء و بدونها الكرسى ملوش لازمة. الدعامة اللى بتبقى فى نص الحزام لازم تبقى على صدر البيبي فى نفس مستوى الأبطين. و مش لازم الحزام يبقى ضيق، هيتعب البيبي. لازم تبقى قادرة انك تدخلى صباعك ما بين الحزام و صدر البيبي، بس مش اكتر من مقاس صباعك عشان ميبقاش واسع.

• النضافة: الأطفال ميتوصوش بصراحة، و فى العربية مع الحركة الموضوع بيبقى كارثى. لازم تبقى عارفة ايه القطع اللى ممكن تفكيها و تغسليها فى الغسالة. يفضل لو ممكن تفكى بطانة الكرسى طبعاً. و اعرفى اللى مش بيتفك ده بيتنضف ازاى.

• الشماسة: مش بتيجي مع كل الموديلات و ممكن تستبدليها بشماسات على ازاز العربية. بس هى اضافة جميلة بالأخص لو انتى زيي و طفلك بشرته حساسة من الشمس. بالاضافة ان الشماسة اثناء النوم بتحمى من تغيير الأضاءة اللى داخلة العربية و ممكن تصحى البيبي.

• اللأدابتر Car Adapter :الأختراع ده جميل بصراحة و حرصت انى اجيبه. عبارة عن قطعة بتتركب فى كنبة العربية. بتتوصل بنقط الأيزو فيكسisoFix . و بتركبى الكرسى عليه. ميزة الأدابتر انه بيركب مرة واحدة بس و بتفكى و تركبى الكرسى من فوقه. هيغنيكى عن مهمة تثبيت الكرسى كل نزولة. و هتبقى متطمنة دايماً ان الكرسى راكب صح و ثابت تماماً فى مكانه. للأسف مش بيبقى موجود مع كل الموديلات لكن ممكن تسألى عن الأدابتر العام Universal Adapter اللى ممكن يركب على عدد كبير الموديلات.

• الأرتفاع: معظم الكراسى بتعتمد على اليد اللى بتترفع منها ان تعدلى منها ارتفاع الكرسى بره العربية. الخاصية دى مفيدة لو هتستخدمى الكرسى و انتى عند مامتك مثلا ككرسى للأكل. الأرتفاع ده بيغير ارتفاع رأس البيبي عشان ياكل من غير ما يشرق. الكراسى اللى بتركب على ادابتر بيقى ممكن تعدلى ارتفاع الكرسى من الأدابتر نفسه كمان و الكرسى راكب فى العربية. هى مش حاجة اساسية بس مفيد انك تبقى عارفة قدرات الكرسى كلها.

• الوزن: هتشيلي الكرسى كتير و مش دايماً هيكون جوزك معاكى. جربى تشيليه قبل ما تشتريه. كل ما يبقى اخف يبقى احسن لأن لسه هتضيفي عليه وزن البيبي.

• الأجزاء المتحركة: الكراسى دلوقتى بقت مزودة بأجزاء كتير بتتحرك. مسند راس بيترفع و ينزل، الكرسى ممكن يلف بالجنب، الظهر بيتفرد، و هكذا. كل ما الأجزاء اللى بتتحرك من الكرسى تبقى اقل يبقى أحسن. لأن دى بتبقى نقط ضعف فى حالة الصدمة، و احنا عايزين أقوى حاجز لأولادنا.

• الترافل سيستم Travel System: معناه انك تجيبي نظام كامل، سترولر و كرسى السيارة مع بعض. دى طبعا فكرة جميلة و موفرة لأن لو اختارتى صح هتجيبي الأتنين سوا ارخص من انك تجيبيهم منفصلين. هنا تركزى مع ان كرسى السيارة يبقى ممكن تركبيه على السترولر. دى تعتبر الميزة الأساسية للنظام ده. انك مش محتاجة تنقلى طفلك لو نايم او للصغيرين جداً اللى بيستريحوا اكتر فى كرسى السيارة. محلات مستلزمات الأطفال كمان مؤخرا بدأت تجمع ترافل سيستم من الموديلات المختلفة اللى عندهم. و هنا هتلاقى كل اللى محتاجة تعرفيه عن البوسيت او السترولر قبل ما تختارى الترافل سيستم.

2 replies on “ازاى تختارى كرسى السيارة او الكار سيت”

Leave a Reply

Your email address will not be published. Required fields are marked *