Categories
9 شهور

ازاى تختارى السرير المناسب

السرير ده من اساسيات اوضة البيبي. بالرغم من ان امهات كتير بتختار انها البيبي ينام جنبها، مهم طبعاً ان الطفل يبقى عنده الاختيار ما بين النوم مع مامته او منفصل. الخبراء بينصحوا ان تنقلى البيبي لسريره بمجرد ما يبطل يرضع عند الطلب. لأنه بيشجع النوم لفترات اطول بالليل و اهو يساعدك تنامى شوية زيادة.

لما تيجى تشترى السرير هيبقى قدامك اختيار من اتنين. الأول السرير الخشب. كلاسيك و شكله بيبقى جميل فى الأوضة. و الأختيار التانى هو السراير الجديدة اللى ممكن تطبق و ليها استخدامات تانية.

قبل ما تقررى هتجيبي ايه فكرى فى:

المساحة: فكرى فى قياسات الاوضة عندك. لو المساحة صغيرة يبقى مش لازم السرير ياخدها كلها. فى جميع الأحوال البيبي هيبقى فى السرير ده لسن 3 سنين قبل ما ينقل على سرير عادى. السراير الخشب ممكن تفصليها حسب المساحة اللى عندك و مع السراير الجاهزة حاولى ميبقاش ضخم عشان يفضل مساحة للطفل يلعب فيها.

الأستخدامات: لو هتجيبيى سرير كلاسيك يبقى لازم تعملى حساب مكان تغيري فيه الحفاضات. مع السراير الجاهزة ممكن تختارى سرير معاه قطعة بتركب فوق السرير عشان تغيري للبيبي عليها. فى الحالتين، ممكن كمان يبقى مع السرير باسكت تتركب على جناب السرير عشان تحطى فيها احتياجات الغيار.

الأمان: السراير الجاهزة بتيجى جاهزة بالبطانة اللى لازم تركب على جوانب السرير عشان البيبي ميخبطش راسه. مع السرير الخشب هيبقى لازم تشترى او تفصلى القطع دى و تركبيها. طبعاً لو انتى عايزة الأوضة يبقى ليها اتجاه معين او تستخدمى الوان مناسبة لنوع البيبي يبقى السرير الخشب ممكن تعدلى فيه اكتر على مزاجك.

الأرتفاع: لازم تركزى معاه كويس. فى السراير الجاهزة اهتمى ان يكون فيه مستويين عشان البيبي ميعرفش ينط منه. فى السراير الخشب، السرير بيبقى عالى من اول يوم و مش بتحتاجى تغيري الأرتفاع.

الثبات: لازم تتأكدى ان السرير ثابت كويس على الأرض و انه مش مايل. الميل ده ممكن يعمل مشاكل فى الهضم و التنفس للبيبي و هو نايم على ضهره. و طبعاً لو السرير مش ثابت معناه انه فيه مشكلة، منصحكيش تحطى البيبي فيه.

و اكيد لازم تعملى حسابك فى اللعب اللى هتعلقيها فوق السرير عشان تسلّى البيبي و تحفزى نشاطه و نموه العقلى و الجسماني.

Leave a Reply

Your email address will not be published. Required fields are marked *