Categories
في المراية

ازاى تحبى شعرك الكيرلى

احنا عندنا مشكلة عنيفة اننا بنعتبر الشعر الكيرلى مش حلو او منكوش! انا شعرى كيرلى و بحبه جداً. طبعا زى كل البنات عديت بمرحلة كنت مش بأشوفه أصلاً، دايماً عاملاه Lisse و بحاول اخبى الكيرلز الجميلة دى. بصراحة فى يوم الموضوع كبر فى دماغى و قررت انى اقضى الصيف بشعرى الطبيعى. و من ساعتها و انا معملتوش تانى و بحبه كده اكتر.

فى الأول كان مجهود عنيف انى اعرف اسيطر على شعرى. بس بالتدريج اكتشفت كام حاجة ساعدونى ان شعرى يفضل صحى، يحافظ على شكل الكيرلز و بيلمع.

 

عكس كل اللى بيتقالك، انتى مش محتاجة تغسلى شعرك كل يوم. عارفة انها ممكن تكون حاجة مرعبة. بس الشعر الكيرلى عامة بيبقى عنده مشكلة مع الترطيب. الشامبو كل يوم، بكل المواد الكيميائية اللى فيه، بيشيل الزيوت الطبيعية اللى بتفرزها فروة راسك عشان ترطب شعرك. تانى حاجة، حركة فرك الرأس عشان الشامبو ينضف كويس بتأذى بصيلات الشعر و بتخلي شعرك يتكسر و يعانى من التطاير. المحافظة على الزيوت الطبيعية هو اهم حاجة. دايما تركزى انك تستعملى شامبو مصمم للشعر الكيرلى لأنه بيبقى فيه ترطيب اكتر.

 

مشط سنانه واسعة. مهم جداً عشان يحافظ على شكل الكيرلز. و شعرك مبلول سرحى شعرك بالمشط الواسع بخفة. مش لازم تتخانقى مع شعرك. كل ما حركة المشط تبقى خفيفة جوا شعرك يبقى احسن. هدفك الوحيد هو انك تتخلصى من العقد اللى بتخلى الشعر يتكسر و يبوظ شكله. ابعدى عن تسريح شعرك بعد الدش. ممكن تسرحيه قبل الدش عشان يسهل تسريحه و هو مبلول. تسريح الشعر الكيرلى و هو مبلول عامةً ملوش لازمة لأنه هيفك الكيرلز و بس.

 

بلاش تعصرى شعرك: الخطأ إللى كل إللى اعرفهم تقريباً بيعملوه. حركة العصر بتكسر الشعر و تضعفه. و بتجهد شكل الخصل الطبيعي. البديل انك تلفى شعرك فى فوطة او تي شيرت قطن. لمدة متزيدش عن نص ساعة. القطن هيمص كل المياه الزيادة و يحبس شوية ترطيب كفاية انه يحافظ على شعرك. حاولى تبعدى عن الأنسجة الصناعية لأنها بتقلل التهوية عن الشعر و ممكن تسبب ريحة سيئة.

 

سيبي شعرك ينشف لوحده. بعد الفوطة. الهوا الطبيعى هيبعد عن شعرك التطاير و هتلاحظى الفرق فى شكل الكيرلز المتماسكة اكتر. لو لازم تستعملى سشوار يبقى استعملى Diffuser. معظمنا بنستعمل الدفيوزر بطريقة عشوائية بس لو مشيتى على الخطوات دى هتحافظى على الكيرلز و هتبعدى عن التطاير. الأول قسمى شعرك، 4 – 6 اقسام تعرفى تتحكمى فيهم كفاية. جمعى اول قسم و دخليه كله جوا الدفيوزر و السشوار مطفى. دلوقتى شغلى السشوار بس متحركيش ايدك خالص. ده اهم جزء، انك متتعبيش شعرك و تفكى الكيرلز و انتى بتنشفيه. بعد ما تخلصى السشوار حركى شعرك براحة من عند الجذور بس اوعى تمررى صوابعك فيه بعنف عشان متبوظيش شكله.

 

اعرفى المنتجات المناسبة لشعرك. مش كل حاجة فى السوق هتناسبك. متخافيش انك تحطى كذا منتج على شعرك. و اعرفى ان كل يوم احتياجات شعرك هتتغير. ايام هتحتاجى شوية Volume و ايام هتحتاجى حاجة عشان التطاير. خلى كمان عندك سبراى مثبت، هتحتاجيه ايام عشان الكيرلز تحافظ على شكلها طول اليوم.

 

و اكيد لازم قبل كل ده تعرفى نوع الكيرلز اللى عندك ايه. Wavy كيرلز و لا كيرلز صغيرة و ضيقة. ابعدى تماماً عن اى محاولات انك تغيري من شكل الكيرلز. من الآخر لأنه مش هينفع. و انتى بتختارى المنتجات اللى هتساعدك فكرى فى شكل الكيرلز. و فى الأول و الآخر هدفك انك تساعدى شكل شعرك الطبيعى و تحبيه اكتر.

Leave a Reply

Your email address will not be published. Required fields are marked *