Categories
في البيت

ازاى تجهزى البرطمانات للتخزين؟

تقريباً كل الستات بيحبوا البرطمانات. البرطمان ممكن تستعمليه فى التخزين او الديكور او الطبخ و حاجات تانية كتيرة. بس قبل ما تعملى بيه اى حاجة لازم الاول تنضفيه من بواقى الاكل كويس و تشيلي الستيكر اللى عليه من بره عشان يرجع برطمان ساده تانى تعملى بيه اللى انتى عايزاه.

طبعاً اسهل طريقة لغسل البرطمانات انك تحطيها فى غسالة الأطباق. بس برضه بعدها لازم تتأكدى ان البرطمان نضيف تماماً من جوه. البرطمانات اللى شكلها مميز شوية، زى برطمان النوتيلا ممكن تبقى اصعب فى التنضيف. البرطمانات الطويلة كمان ممكن اندفاع المياه فى الغسالة ميبقاش كافى انه ينضف القاع. راجعيهم كويس.

لو هتغسليهم بأيدك يبقى انصحك تستعملى فرشة غسيل الازايز أو فرشة السنان. هتسهل العملية بكتير و هتوصل لكل ركن. زودى مع الصابون و مع مياه الشطف نقطتين خل عشان يطلعوا الروايح القوية من البرطمانات.

طيب، عشان تشيلي الستيكر من على البرطمان قدامك طريقتين:

الطريقة الاولى

انقعى البرطمان فى مياه دافية عليها ½ كوباية خل. عشان تستفيدي من الطريقة دى فعلاً انقعى البرطمانات بالليل فى المياه و الخل. انا بحوش كام حاجة كده و املى حوض المطبخ و انقعهم سوا.

الطريقة التانية

لو انتى حاولتى تشيلي الستيكر و فضل منه اللزق بس على الازاز. اخلطى معلقة كبيرة زيت مع معلقة كبيرة بيكربونات صودا لحد ما يكونوا معجون. حطى المعجون ده على البرطمان و ركزى على المنطقة اللى فيها اللزق. سيبيه 10 دقايق على الاقل قبل ما تغسليه بالمياه و الصابون.

برطمان تخزين

مبروك البرطمان بقى فلة. ممكن بقى تعملى بيه اللى انتى عايزاه. بس لو هتخزنيه و مش هتستعمليه على طول يبقى لازم تنشفيه كويس جداً. و تحطى جواه منديل مطبخ او ورقة زبدة او ورقة بيضة. هتمنع ان البرطمان يعمل ريحة و تمتص اى رطوبة ممكن تبوظه. كل فترة راجعى البرطمانات الفاضية: اغسلبها و نشفيها و غيريلها المنديل.