Categories
9 شهور

ازاى تاكلى كويس اثناء الحمل

التركيز مع اكلك مش حاجة سهلة و انتى مش حامل، خاصة لو بتحاولى تمشى على دايت او تبعدى عن مجموعة معينة من الأكل. و انتى حامل الموضوع ممكن يبقى اصعب شوية، لأنك بتعملى كدة عشان صحة البيبي و عشان يبقى حملك صحي و تبعدى عن اى مشاكل ليها علاقة بنوعية اكلك.

انا مش دكتورة تغذية و مش هاحاول اديكى اى معلومات طبية. بس دى تجربتى فى انى احافظ على نظام اكلى و تغذية البيبي.

ًاهم حاجات لازم تركزى معاها اولها الكالسيوم، و بعده الخضار و الفاكهة ثم البروتين. لازم كل يوم تحرصى انك تاكلى من الأربع حاجات دول. ده بغض النظر عن المياه طبعا.

حطى سناك جنب سريرك: لو قلقتى من النوم حاسة انك جعانة متستنيش لحد ما تصحى فى ميعادك عشان تفطرى. ممكن دى تكون طريقة جسمك انه يقلك ان الغذا قليل او انك مكلتيش كويس فى العشا. حاجة بسيطة زى المكسرات او البسكوت جنبك ممكن تاخدى منها كام واحدة لحد ما تحسى انك قادرة تصحى تحضرى فطار.

3 وجبات اساسية يومياً: اهم حاجة هى الفطار طبعاً. بس و انتى حامل الغدا و العشا بيبقوا مهمين زيه بالظبط. حاولى فى الـ3 وجبات تدخلى اكبر نسبة ممكنة من العناصر الغذائية. فى الفطار ممكن تدخلى البروتين فى شكل البيض او بروتين نباتى زى الفول او الحمص. فى الغدا ممكن تدخلى الألبان كجبنة او سلطة زبادى جنب الأكل. و فى العشا ادى اهتمام اكتر لأى عناصر حاسة انك ماخدتيش كفايتك منها اثناء اليوم.

3 سناك فى اليوم: دول بقى تاكلى فيهم خضار و فاكهة و تشربى عصاير على اد ما تقدرى. ممكن تعملى فروت سلاد و تاكلى منها على مدار اليوم او تعصرى فاكهة او هوت شوكليت. دلعى نفسك بقى. لو زهقانة، علبة زبادى هتبقى كفاية اوى.

المياه: لازم تشربى كتير و تتابعى انتى شربتى اد ايه طول اليوم. الحامل جسمها بيبتدى ينتج دم زيادة عشان يغذيكي انتى و البيبي. السوائل مهمة جداً بس عمرها ما هتغنيكى عن المياه. ممكن تنزلى موبايل ابليكشن تسجلى فيه كل كوباية تشربيها او تعملى زيى و تشترى ازازة عليها علامات توريكى انتى شربتى اد ايه. المياه كمان هتسهل حركة الهضم و تريح معدتك جداً.

اعملى روتين اكل يومى: يعنى اتعودى انك تاكلى فى مواعيد معينة. مش لازم نظام صارم بس لو متعودة تصحى فى ميعاد ثابت هتلاقى نفسك بتاكلى فى مواعيد ثابتة من غير ما تحسى. الروتين ده كمان انا حسيت انه ساعدنى جدا فى حركة المعدة و ساعدنى انى آكل احسن. طبعاً كوباية اللبن قبل النوم دى اساسية و هتشربيها كلها.

الخضار و الفاكهة: لو بتحبى تاكليهم لوحدهم بين الوجبات زيى يبقى حاولى انك تعدى 5 ثمرات فى اليوم. طبعا دول ملهمش دعوة بالوجبات الأساسية. لو انتى العكس يبقى العصاير و السلطة هم صحابك. اهم حاجة ان ده ميبقاش مبرر انك متاكليش كويس فى الوجبات الأساسية. خبى كوساية مبشورة جوة صوص المكرونة او زودى خضار مشكل للرز.

و انتى بره البيت: شنطتك لازم يبقى فيها اكل. فى اول حملى كنت بوقف جوزى تقريباً عند كل كشك او بنزينة فى طريقنا. المشكلة ان مفيش حاجة مفيدة ممكن آكلها، عبارة عن سكريات او كالوريز عشان ميجيليش هبوط. لقيت الحل انى اعمل حسابى على كام سناك كده فى شنطتى خاصة لو هعمل مجهود زى المشى. الجرانولا بارز جميلة جداً، مغذية ومش محتاجة منك اى تحضير. الفاكهة و الخضار السهلة زى الموز، اليوسفى.، الخيار. او علبة زبادى بس.

متستسلميش للغثيان: فيه حوامل كتير بيخسروا وزن فى اول 3 شهور عشان مش متشجعين انهم ياكلو. اكتشفت ان الاكل المالح بيقلل الغثيان و بصراحة بيشجعنى آكل اكتر. شوفى ايه اللى هيساعدك و متخليش الغثيان يغلبك.

و دايماً متنسيش انك بتاكلى و عندك هدف: تغذية البيبي اولا ًو كمان المحافظة على صحتك. اكلك بيأثر فى نوعية الغذا اللى بيوصل للبيبي و هيفرق جامد فى حملك و ولادتك. البيبي هياخد الغذا بتاعه من جسمك، لو مكلتيش كويس هتحسى بالارهاق و ممكن تجيلك مضاعفات صحية. انا هدفى الأساسى هو تغذية كويسة تساعدنى على ولادة سهلة.

Leave a Reply

Your email address will not be published. Required fields are marked *