Categories
في البيت

ازاى بحافظ على بيتى نضيف

اول ما اتجوزت كل حاجة فى البيت كانت جديدة و التنضيف مكانش محتاج مجهود كبير، بس مع الوقت بدأ الموضوع يبقى اصعب لأن كل حاجة مع الأستعمال بتحتاج اهتمام اكبر و بيبقى امتصاصها للأتربة اكبر. عشان انا بشتغل كمان، الموضوع كان اصعب، لأن وقتى فى البيت محدود و لازم اقسمه صح. كنت الأول بحط كل المجهود فى يوم او اتنين من الأسبوع و اتمنى ان كل حاجة تصمد للأسبوع اللى بعده. بس النظام ده منفعش، لأن كان بيبقى ورايا مليون حاجة فى يومين اجازتى اللى بصراحة ببقى عايزة اقضيهم مع جوزى و بنتى، مش الغسالة و المكنسة. قررت انى اجرب نظام مختلف، انضف يومياً، قلت انا اخصص ساعة كل يوم انضف فيها كل يوم حاجة و آخد الجمعة اجازة كمان. انا هساعدك كمان تظبطى وقتك على مزاجك. طبعاً النظام ده هدفه العناية المستمرة بالبيت بغض النظر عن المرة الشهرية او كل اسبوعين اللى بنقلب البيت فيها و ننضفه التنضيفة التمام. هنعمل جدول تنضيف للأسبوع كله. ممكن تطبعى جدول التنضيف الفاضى من هنا و نملاه سوا.

١. ابتدى على ورقة أكتبى انتى عندك كام اوضة فى البيت: المطبخ، الحمام، اوض النوم، الليفينج، السفرة و هكذا. و زودى مكان سميه “اضافى”.

٢. اكتبى جنب كل اوضة بتحتاج منك ايه فى التنضيف، الأساسيات هى الكنس و المسح و التلميع. بس فى كل اوضة بيبقى فيه مهمات مختلفة، فى اوض النوم هتغيري الملايات، فى المطبخ و الحمام هيبقى عنك حاجات مختلفة تماماً.

٣. طيب، فى جزء “الأضافى” هتكتبى المهمات اللى مش تبع اى اوضة زى الغسيل مثلاً.

٤. دلوقتى هتبصى على كل المهمات دى. طبعا شكلها كتير و مرعب. دلوقتى هنخففها. فكرى فى كل مهمة من دول و اكتبى جنبها هى مهمة اسبوعية و لا يومية. اليومى غالباً هيبقى معظمه جاى من المطبخ.

٥. املى بقى الجدول تحت أيام الأسبوع؛ اكتبى المهمات اليومية الخاصة بكل يوم.

٦. طيب هنملى المهمات الأسبوعية: يفضل انك تبتدى الأسبوع بالمناطق اللى مش بتقضى فيها وقت كتير زى اوض النوم. و المناطق اللى هتأثر فى مهمات بقية الأسبوع زى الغسيل. انا افضّل اننا نبدأ الأسبوع بأوض النوم فعلاً عشان اطلع منها الملايات و الهدوم اللى هتتغسل الأسبوع كله. انا نظامى معتمد على انه كل يوم اوضة. اختى مثلا عشان المساحة عندها مفتوحة شوية فعندها حاجة زى الليفنج ممكن تتعمل اكتر من مرة فى الأسبوع. قسميها بالمناطق و مستوى الصعوبة. يعنى متقرريش انك تعملى البيت كله بالمكنسة فى يوم واحد. خليكي واقعية، انهارده هتعملى الأوضة دى بعينها، يبقى تستلميها بكل مهماتها. دى ممكن تكون اصعب حتة، متقلقيش، ركزى كده و تخيلي كل مهمة هتحتاج منك وقت قد ايه.

٧. هيفضل عندك المهمات “الأضافية” زى ترويق الدواليب و الغسيل: لو بتغسلى مرتين فى الأسبوع يبقى تحطى الغسيل فى يوم خفيف و يكون قبله بيوم ترويق الدولاب. احنا تلاتة بس فبغسل مرتين لتلات مرات فى الأسبوع.

٨. يفضل عندك شوية حاجات رخمة زى تلميع الأزاز مثلاً. اعمليهم كل شهر. دول مش محتاجين يتعملوا كل اسبوع فى جميع الأحوال. املى بقى منطقة للمهمات الشهرية.

لو التزمتى بالجدول يبقى لازم تلتزمى بقوانين الجدول كمان.

لا تؤجل عمل اليوم الى الغد: يعنى لو وراكى غسيل، اوضة عايزة تتنضف و مشاوير كمان عمرك ما هتخلصى. لأن بكرة هيطلعلك حاجات جديدة تعمليها. متأجليش أبداً لأنه هيصعب عليكي مهمة التنضيف و العناية بالبيت. و بالتدريج لما هيبقى وراكى حاجات قليلة كل يوم مش هتكسلى و هيبقى عندك وقت اكتر لأنشطة تانية.

المطبخ يبات نضيف: لو صحيتي من النوم و لا رجعتى من الشغل و بدأتى اول حاجة تغسلى اطباق و تنضفى المطبخ، نفسك هتتسد. خليها آخر حاجة تعمليها. هتوفرلك فى وقتك بجد بالنهار و هتريحك نفسياً.

اعملى حاجة كل يوم: حتى لو جدول التنضيف هيبقى صعب الألتزام بيه فى الأول لو عملتى منه حاجة واحدة كل يوم هتشيليها من دماغك و مش هتبقى فى منتهى الصعوبة الأسبوع اللى بعده.

خدى يوم اجازة: الجدول للتنضيف بس. لسه وراكى حاجات تانية تتعمل فى البيت و للشغل. الأجازة هتفرق معاكى جداً و هتحسسك انك عندك قدرة بتبدى الأسبوع الجديد. الجمعة اجازة ده اساسى.

خففى الحِمل: انا عارفة انى بأجى على آخر الأسبوع و البطارية بتفضى خالص فبخفف من اللى هعمله فى آخر يومين دول. بأخلى الأربعاء و الخميس عندى مهمات بسيطة جداً.

العناية بالبيت: طبعا بيبقى عندك لمبة عايزة تتغير او عفش عايزة تغيري مكانه و مش قادرة او مش لاقية وقت. انا بفضى جزء كبير من الوقت السبت مخصوص عشان المشاريع الحلوة دى اللى دايماً بتحتاج مشاوير معاها.

وقت للعيلة:كمان بدور اونلاين على حاجات انا ممكن اصنعها بأيدي للبيت او للأطفال و بنقضى النهار نعملها سوا.