Categories
Featured في البيت

ازاى اوفر فى مصروف البيت

الأسعار فى جنون الأيام دى، و ده خلى ترتيب الأولويات أساسى فى تنظيم مصروف البيت وهو ده بداية التوفير. عن تجربة، ١٢ فكرة أساسية هيساعدوكى على التوفير و تنظيم الميزانية صح.

 

١. احسبى دخلك الشهرى كله كام و شيلى منه فلوس ايجار، أقساط، جمعيات و فواتير. المدفوعات الثابتة شهرياً يعنى.

٢. بعدها اشيل فلوس للطوارئ على جنب، الواحد ميضمنش الظروف حتى لو 100 جنيه.

٣. ابتدى بحاجات الصيدلية: أدوية، حفاضات و كريمات و مستلزمات الأطفال عموماً.

٤. دايما يكون فيه ورقة و قلم فى المطبخ اللى يخلص تكتبيه فوراً عشان النسيان حاجة طبيعية .

٥. جهزى تموين شهرى عندك زى زيت، سكر، رز، مكرونة، دقيق و بقوليات زى العدس و الفاصوليا و اللوبيا و الفول.
كل الحاجات دى هتنفعك اخر الشهر و تخليكى متشتريش حاجة من برا.

٦. دايما اشترى فاكهة و خضار الموسم بتكون طازة أكتر و سعرها أرخص و طعمها أحلى. الأهم من ده كله انك تخزنى منها فى الفريزر زى الطماطم مثلاً لما تبقى ب 2 جنية تشيليها و تطلعى منها لما توصل ل 12 جنية و كذلك مع معظم أنواع الفاكهة و الخضار.

٧. جهزى منيو أسبوعى أو شهرى بالأكلات، خصوصاً الغداء، هيسهل عليكى حيرة كل يوم و يخليكى متتزنقيش اخر الشهر.

٨. حاولى تعملى الحلويات فى البيت أوفر 100 مرة و أنضف أكيد. انتى عارفة ان نصف كيلو الكنافة ب 6 جنية زائد 8 جنية كيلو مانجا يعمل صينية تكفى 5 أفراد و احنا بنشتريها ب 200 جنية!

٩. تابعى عروض السوبرماركت و ركزى على المنظفات و مسحوق الغسيل لو عليهم عروض مش هيخسروا فى حاجة. لكن خلى بالك، ساعات بتبقى عروض فشنك و تدبسى فيها و خلاص، اشترى بس اللى يناسبك فى العروض. اعرفى ازاى توفرى فى ميزانية السوبرماركت من هنا.

١٠. نحاول نروح الهايبرماركتس الكبيرة مرة فى الشهر أو مرة كل أسبوعين بالكتير و اللى ينقص نجيبه من سوبرماركت الحى جمبنا عشان اختياراتنا تبقى محدودة و نوفر.

١١. اعملى حساب خروجة أسبوعية أو شهرية مهما كانت بسيطة و متواضعة، تخرجى فيها كل طاقتك السلبية و ترجعى لشغل البيت فريش كده تكملى مسيرتك بنشاط و حب من غير تعب.

١٢. اعملى حساب المناسبات من بدرى شوية زى هدية لأختك اللى ولدت أو عيدية و لبس جديد للأطفال المهم انك متجيش على حساب البيت و تقصرى فيه و فى نفس الوقت تجيبى و تتبسطى.

1 reply on “ازاى اوفر فى مصروف البيت”

[…] ٦. وفري وقت ما تقدري معظم الوقت الواحد بيفكر في التوفير، بس لازم تبقي برضه منطقية. انا دايماً بأختار الجودة بدل الكمية. يعني مش منطقي اشتري ١٠٠٠ كيس سندويتشات بس نوع بلاستك رخيص و انا في الشهر بستخدم ١٠٠ بس. يبقي الشهر ده اشتري ال١٠٠ بس يبقي نوع صحي و ممكن اعيد استخدامه كمان و مع تحسن الميزانية ممكن ابقي اشتري كمية اكبر في عرض و اوفر علي المدي البعيد. التوفير كمان بشطارتك في انك تقللي من الاكل بره، خدي ايام راحة من الاكل بس خليها ايام محددة في الاسبوع. لحد ما تتعودي علي المطبخ اكتر. تابعي عروض السوبرماركتس و المحلات و ركزي مع الحاجات اللي عايزة تشتريها. دوري اونلاين كمان، ممكن تلاقي deal احسن. وفري في الكهربا بأنك تغيري للمبات ليد موفرة و طبعاً تطفي و تفصلي اي اجهزة مش بتستخدميها عن الكهربا. فكري في طرق للتوفير، بس بدون حرمان. لأن ده اول حاجة هتبوظ خططك. اعرفي من هنا ازاي توفري في ميزانية السوبرماركت. و من هنا ازاي توفري في مصروف البيت. […]

Leave a Reply