Categories
مع العيال

ازاى احمى ابنى من أول يوم

أكتر حاجة بتقلقنا كأمهات فى أول أيام من ولادة البيبى الحموم و تغيير الحفاضات و نرضع البيبى ازاى و أى حاجة فيها حركة كتيرة للكائن الضعيف الصغير ده، معلش ده شئ طبيعى جداً. انتي بتتعلمي و ابنك كمان بيتعلم معاكى و بعد فترة كل ده هيبقى روتين سهل جداً عليكى و عليه، أهم حاجة بس تجمدى قلبك و تجهزى كل مستلزماتك و احنا هنقولك تعملى ايه.

 

هنحتاج ايه معانا؟

• بانيو البيبى

• سبونج / سفنجة على شكل جسم البيبى

• ليفة ناعمة

• شامبو

• شاور جيل

• زيت للأطفال

• بشكير

• فرشاه شعر

• قصافة الأظافر

• لبس قطن مريح

• قطن لتنضيف الودان

• قطنة بكحول لتنضيف السرة

 

روتين الحموم اليومى

• نملا بانيو البيبى مياه دافية وسواء كان الحموم فى غرفة البيبى او فى الحمام نراعى جو الغرفة يكون دافى و بلاش تغيير درجات الحرارة.

• فى الأول يُفضّل حد يساعدك لأن جسم الطفل لازم يكون مرفوع و ممسوك من الراس كويس و نخلى بالنا على العينين و الودان ميدخلش فيهم مياه او صابون.

• مش مطلوب أن الطفل من أول الولادة يبلبط بس الحموم للنضافة، يعنى مدة الحموم تكون قصيرة و كل مايكبر نطول شوية و هتبقى فقرة ممتعة يومياً.

• نركز على الثنيات فى جسم البيبى و ننظفها كويس.

• الفوطة أو البشكير يبقى جاهز جمبنا نطلع البيبى من بانيو الحموم عليه بسرعة عشان ميبردش و ننشف كويس اوى.

• بعد الحموم ممكن ندهن جسم البيبى بنقطة زيت للأطفال أو زيت زيتون.

• امسحى حوالين السرة بقنطة بكحول و حاولى تحافظى على المنطقة دى جافة على قد ما تقدرى.

• قص الأظافر بيكون أسهل بكتير بعد الحموم، الأظافر بتكون أطرى و الطفل مسترخى و مستسلم.

• فى أغلب الأحيان البيبى بعد الحموم بياخد نومة حلوة فيفضل يلبس لبس مريح و مناسب للنوم و نغطى راسه و ايديه و رجليه.

• أنسب معاد للحموم ممكن يكون بالليل لنوم هادئ و طويل الى حد ما و ممكن بالنهار لو الجو برد.

• المهم يكون الطفل مش جعان و مقريف و لا بعد الأكل فورا يعنى نستنى ٣٠ دقيقة بعد الاكل و بعدها نبتدى نحمى.

• كل ما الطفل يكبر ممكن تزودى فترة الحموم و تشجعى لعب المياه لأنه بيساهم فى نموه العقلى. استعدى لشراء لعب للمياه و خناقات الخروج من البانيو.

Leave a Reply

Your email address will not be published. Required fields are marked *