Categories
مع العيال

أفضل العاب ممكن تشتريها لسن سنة

مش هقول عليهم العاب انا إللى صنعتها ولا منتسورى فى البيت، الموضوع مش أكتر من أن ابنى كبر و بقى عنده سنة. نشاطه زاد و مهاراته عايزة تنمية و أنا عايزة اشتري له لعب الدنيا كلها بس فى نفس الوقت الموضوع مش تسلية و خلاص. أنا عايزه اساعده على الفهم و الكلام و يتعلم كل حاجة فى البيت زى الحضانة و أحسن كمان.

الطفل فى السن ده بيحب يمسك كل حاجة بأيده و يحس بيها و يا سلام لو تكون بتطلع صوت. الأكتشافات الجديدة بالنسبة له حاجة مدهشة.

 

• مثلاً و هو بيحاول يتكلم بيبقى عايز يسمع الحكايات بطريقة مختلفة و جديدة تلفت انتباهه زى العروسة اللى بتتلبس فى اليد و تحكيله الحكاية بطريقة ممتعة أكتر بكتير من الكتاب اللى بسهولة ممكن يقطعه لو مش مصنوع من كرتون مقوى.

• وقت الحموم هو أحلى فقرة فى يوم ابنى عشان كده بأملى له البانيو العاب زى ليفة الحموم، دلوقتى بقى فى منها أشكال كتير أوى، تقريبا كل مرة بأنزل باشتريله واحدة جديدة. أشكال هندسية و على أشكال الفواكه و الحيوانات.

• فيه كمان الكور الصغيرة على قد ايده بتعلمه هات و خد و نحدفها لبعض و كل احدة بشكل و لون مختلف.

لعب اطفال العاب

• أكتشفت ان تقريباً الولاد كلهم فى السن ده بيحبوا يمسكوا أى حاجة فى ايديهم و يخبطوا بيها، بس بدل ما يكسروا البيت، فيه العاب مناسبة للنشاط ده، زى عدة النجار و معاها الشاكوش، لعبة ابنى المفضلة.

لعب اطفال العاب

• البيانو ( الأكسليفون) و ده بقى اختراع، هو موجود من زمان بس احنا معظمنا ناسينه مع انه هايل و بينمى حاسة السمع. فى نفس الوقت الطفل بيتبسط لما بيخبط عليه و يلاقى حاجة بتتجاوب معاه و تطلع موسيقى، بيحس انه عمل انجاز لوحده. بيبقى معاه عصايتين ممكن تلعبوا سوا.

لعب اطفال العاب

• الألعاب الموسيقية البسيطة فى السن ده مسلية زى اللى بتقول أسماء و أصوات الحيوانات. منها فيه فى النص طبلة و الوانها تبقى جذابة و بتعرفه كمان على الأشكال الهندسية.

لعب اطفال العاب

• فك و تركيب الحلقات من أشهر اللعب فى المحلات من سن سنة و فيه منها الغالى اللى مقاسة كبير لحد الصغير العادى. كلهم فى الأخر بيقوموا بنفس المهمة.

 لعب اطفال العاب

• البازل البسيط، بالكتير يتكون من 4 قطع ممكن نبتديه من سن سنة بس منتوقعش ان الطفل يتقن لعبه بدرى احنا بس نكون له فكرة عن اللعبة.

• ألعاب تطابق أشكال الحيوانات، نشيلها و نحطها مكانها، سهلة و بتعلم كمان أسماء الحيوانات و أشكالها. بس ناخد بالنا واحنا بنجيب اللعب الخشب تكون نوع نضيف جداً مش ردئ عشان ميعورش الطفل و هو بيلعب.

لعب اطفال العاب