Categories
في المطبخ

أسهل بسكوت فى العالم

لما ابنى ابتدى ياكل كان بيحب يمسك فى ايده بسكوته يقعد يعضعض فيها، كل مرة كنت باجيب البسكوت من السوبرماركت كنت باحس بالذنب و انه صغير أوى على البسكوت اللى مليان مواد حافظة ده. فى نفس الوقت أنا مش فاضية للعجن و الخبز. بس أنا بحب اخترع لنفسى طريقة سهلة و نظام سريع عشان مزهقش و متبقاش مرة و خلاص. جبت قطاعات أشكال و اخترت وصفة مكوناتها الأساسية متوفرة فى البيت عندى كل يوم. جربوا طريقتى لأسهل بسكوت بأعمله و كل مرة بطعم و شكل مختلف.

نصف كوب زيت

نصف كوب سكر

2 بيضة

فانيليا

معلقة صغيرة باكينج بودر

3 كوب دقيق مع رشة ملح

نضرب الزيت مع السكر فى الخلاط و نضيف البيض و الفانيليا لحد ما السكر يدوب و يبقى خليط سائل و ناعم.

لو مفيش خلاط و ضربتيه بمضرب سلك يدوى عادى هيطلع نفس النتيجة عشان هنا استخدمنا الزيت مفيش زبده ولا سمنة. المهم تحرصى ان الخليط يكون بدون كتل و ان السكر داب.

نضيفه على الخليط الجاف الدقيق، الباكينج بودر و رشة ملح لحد لما العجينة تلم معاكى و تبقى متماسكة.

لو احتاجت شوية دقيق كمان نزود مفيش مشكلة، كل نوع دقيق مختلف عن التانى.

نسيبها ربع ساعة ترتاح فى التلاجة و بعدين نطلعها و نفردها بالنشابة على رخامة تكون مرشوشة دقيق و نشكلها زى ما احنا عايزين.

تدخل فرن متوسط الحرارة على 180 درجة و نتابع لحد ماتاخد اللون الذهبى من تحت.

الأضافات:

بشر برتقال مع معلقتين عصير برتقال هيدى طعم البرتقال اللذيذ.معلقة قرفة صغيرة تخليه بسكوت ريحته محصلتش مع فنجان قهوة.2 معلقة كبيرة كاكاو خام و يبقى بسكوت بالشيكولاتة يعجب الأطفال.

Leave a Reply