Categories
Featured في المطبخ

أسرار نجاح عجينة البيتزا

المخبوزات عموماٌ كتير مننا بيحس انها صعبة و يخاف تَفشل منه بعد تعب و عجن و بهدلة الدقيق.
أنا هنا هقولك شوية خطوات مهمة لو مشيتى عليها هتوصلى لعجينة ناجحة كل مرة.

 

١. اختارى نوع خميرة ممتاز و تاريخ صلاحيته جديد، ده بالنسبة للخميرة الجافة الفورية اما الخميرة الطازة تجيبيها من فرن عيش شغال كويس و عليه ضغط و تشمى ريحتها و دايماً تجيبى كمية قليلة على اد إستخدامك.

٢. الخميرة مش أحسن حاجة تتخزن. الباكيتسً الصغيرة فى الخميرة الجافة دى هى صديقتك، الباكيت بيعمل 500 جرام دقيق، و الخميرة الطازة ممكن كل اللى تحتاجيه منها قطعة اد البندقة و الباقى شيليه فى الفريزر.

٣. و لأن الخميرة هى أساس كل حاجة فى نجاح العجينة الأضمن تختبريها الأول حتى لو جديدة.
نختبرها ازاى؟

نجيب نصف كوب ماء دافئ
معلقة كبيرة خميرة
2 معلقة كبيرة سكر
2 معلقة كبيرة دقيق
نخلطهم و نسيبها 10 إلى 15 دقيقة لحد ماتعمل رغاوى كده تبقى شغالة تمام.

٤. انصحك تركزى فى نوع الدقيق اللى هتستخدميه. عجينة البيتزا و المخبوزات عموماً لازم تكون فيها نسبة جلوتين عالية و الجلوتين ده نوع بروتين بيبقى فى الدقيق و هو اللى بيعمل الشكل المطاطى للعجين أو العرق، يعنى مش بيخلى العجينة تقطع منك فتحتفظ بالخميرة كويس جواها و ده اللى بيساعدها تعلى و تنفش.

٥. جبتى نوع دقيق مناسب و كله تمام، وقت الأستخدام لازم يتنخل 3 مرات على الأقل.

٦. المكونات كلها المضافة للعجين زى البيض و اللبن أو الزبدة يفضل تكون بدرجة حرارة الغرفة.

٧. جهزى المياه اللى هتعجنى بيها الأول لازم تكون دافية لأن المايه الساقعة مش هتشغل الخميرة و العكس صحيح، المياه السخنة تموتها.

٨. اخدمى العجينة كويس، يعنى اعجنيها مش اقل من 10 دقايق و هى هتردهالك فى الآخر و تطلع لك مخبوزات هشة و مظبوطة على اد تعبك فيها.

٩. لازم العجينة تاخد وقتها تخمر. اديها فرصتها يعنى ساعة مثلاً بعد العجن و نص ساعة بعد التشكيل و قبل الفرن.

١٠. فيه بعض المعجنات بتحتاج الفرن يكون دافئ مش سخن أوى، نراعى دايماٌ درجة الحرارة المناسبة .

1 reply on “أسرار نجاح عجينة البيتزا”

Leave a Reply

Your email address will not be published. Required fields are marked *